Even though the results might not be apparently visible, progress might be going on in the background (Anonymous).

Chu·sokanina mingsa nangchongmotgipa kamde chakchikanian ong·a. Chakchikani biteko sengmitingo an·ching uko nikna amja. Chanchisooba, salgi tangsimao aram gipok-gipok balbringe dongaoni gimaanga gita dakaia. Basakobade uni biteko man·na skangan mitamde rim·tape ninamangba man·rikja. Mairongpil·e indakgipa manderangna rasong griani! Aiao, sawade uni biteko cha·tote nina sikja, gimikan kamni kri bitetangko nikpanade sikbebea da·nang…, indiba rim·rok-dangrok dakriknaba man·gijagipade ku·chi minok dakmanaigen. Ka·ara amja, aro bilara sokja.

Da·ororoni somai, maiko aganna. Gimikchian daariani, sakantian susaani, saksa-sakgipinna batna-chuna sikanian gapaia. Tikkelanirang donga, jotton ka·anirangan gapa; indiba uarangna ja·ku-ja·sane niao mitamde somaina sengna arate sakgipinni ja·ga nange nosto ong·atako man·tokenga. Sana maia ong·gen aro basako maiko chagronggen, ian salantio sing·ani ong·enga. Janggi tangao angara maiko dakgen, maikai dal·jokoara an·tangna cholrangko basee ra·gen, ba uandaken chanchianide dongtelaia.

Proverbs says, “No great things are created suddenly. Learn to wait for the results” (Anonymous).

Chinao rokomsa wa·a gnang, jean ja·bra pekwatgiminko ge·oba, somaiantion una chiko rutimoba aro a·salrangko bakdiloba skanggipa bilsi bri (4)-na kingkingde dal·baakon niknan man·jachim. Indiba bilsi bonga (5)-gipaode rang·sanan ft. 80-mangona kingking dal·bae jadokni gisepon bang·a bipangrangko nikskana man·achim. Nabaanide rang·san bimango ong·jaha, indiba a·ani ning·achide ka·sine ka·sine bimangko taribaaha. Pangnan biteko niknade somai nanga. Salsano ge·e, uko apsan salo rapilnade amgijani ong·a ine aganara kakket! Do·bima bitchiko chi·oba uko joljolde pe·atrongja, indiba bitchiko an·tangan bamchenga aro ja·mano somai ong·ahaon uko pe·ata. Chakchikna amgijagipa aro sengna aratgipa mamingsaloba biterangko nikna amja. Kam ka·ani biterangko nikjaoba uarangna ka·suanggija, duk ong·gija sengosa nama.

Proverbs says, “Slow and steady wins the race”.

1. Duk Chakanian Chakchikani Bite
Bang·a chu·sokgipa manderangan chakchikaniko dal·nikgiparang ong·a. Uamangni duk chakania baditana ning·tuachim, an·ching u·ija. Maidakgipa obostarangko uamang chagrongachim, an·ching nikja; indiba chu·sokgipa ong·anina chakchikanio dukko chakchong·motaha. Chakchikani biteko man·na duk chakjaode chu·sokna amjawa. Duk chakna sikani gisik dongjaode nikjagringanirang indin nikanisan ong·aigen. Mandeo duk chakna sikani ran·changode aro maiko dakenga uko ka·tongo ra·chakna amjaengode, indide biteko man·na chakchikanio chu·sokgipa ong·jawa. Jensalo an·ching maikoba dakna chanchia, unon ua kamna duk chakna nanganiko donna man·na nanggen. Unosa chakchikani biteko man·gen. Kamko ka·on tong·sa ka·e donaiani ong·ja, indiba gisik-ka·tong gimikchi uko dakosa biteko man·gen. Sastroo agana, “Nang·ni jakni dakani pilak kamkon nang·ni bilchi dakbo; maina nang·ni re·gni a·ningo kam, ba chanchisoani, ba u·iani, ba gisik gnangani dongja” (Aganprakgipa 9:10).

2. Kakket Ong·anian Chakchikani Bite
Chona ba dal·a kamko ka·oba kakket ong·aniara nama. Iani mongsonggipa ong·ani gimin Jisu an·tangan jinmana skiaha. Ua agana, “On·titini gimin bebegipa bang·ani giminba bebe ong·a; aro on·titini gimin bebegijagipa bang·ani giminba bebegija ong·a. Uni gimin na·simang bebegija gamin gimin bebe ong·jahaode, sawa gam chong·motna na·simangna ka·donggen” (Luke 16:10-11). Kakket ong·aniara an·chingni man·gni bitena chu·sokna dilenggipa kaman ong·a. Ian, ua chakchikani biteko man·na ua gita re·pakna nangako miksongja, indiba ua kakketaniko janggi tanganio chu·gimik jakkalanikosa miksonga. A·gilsakni gita ong·oba, ua kakketani gunko siatgija janggi tanganio dakode, indide kosako donggipa Isol nang·na bang·e pattianiko on·skagen. An·tangni man·gnigipa bitena sengengon, kakketani aro chakchikani dongjaode maio pangchake uanona sokanggen. Ian, altuagipa kamde ong·ja, indiba ua gride ong·nan amskajawa.

3. Ga·akaniba Chakchikani Biteko On·a
F.M. Britto-ni segipa ki·tapo Jack Canfield aro Mark Victor Hansen-ni series book, “Chicken Soup” a·bachengode publish ka·na man·jaha. Uamang sakgnian 1989 bilsio seaniko matchote publish ka·china on·ahachim, indiba ge·sani ja·mano ge·sa dake, ge 39 publisher-rangan segatgimin kattarangko jegalaha. Gisiktangode uamang ka·beaha aro duk ong·ahachim, indiba uamang chakchike kam ka·aniko watgaljaha. Bon·kamao, chonbegipa publisher uamangni ki·tapko publish ka·aha. Ja·mano, “Chicken Soup for the Soul” ki·tapara 1995 bilsimangode America a·songni palna man·batsranggipa ki·taprangoni mingsa ong·baaha. Ua somaio million 7 mang palnangaha. Uni ja·manoba million 30 mang ong·pile ua ki·tapko palnangtaiaha. A·bachengo uamang chu·sokjaha, indiba chakchike kam ka·anichi Canfield aro Hansen ja·mano namen chu·sokgipa ong·skaaha.

Mande sakantian chegipade ong·telja. Saoba chu·sokna gitiko ga·aka, mitamara man·na gitiko dontongna draatako man·a. Chakchikani biteko man·gipa sakantian maiobade ga·akanirang gnang. Neng·nikanirangko chagrongoba mitam manderang chu·soktoka, aro uamango neng·nikani dongjani giminde ong·ja.

Psychologist Bob Atkinson indake agana, “Failure is always the first step in success.”

Thomas Edison, Electric Bulb-ko tarion chang 1,100 na kingking chu·sokjaha aro million 2 mang ong·pile koros ong·aha. Indiba ua indake agana, “Chinga ga·akkamjaha. Indiba chang·anti dake nianion gital gitalrangko skie ra·na chol ong·aha. Ga·aka changantian maiko skia man·aha uko pangnan an·tango sing·rongbo,” ine ua agandapkuaha.

Bollywood star Shah Rukh Khan interview ra·ani somaio indake agana, “Film ge 21 mangko kal·piloba camerako nikon anga kenjagoka dongkuaiachim.” Trimurti ingipa filmko kal·mitingoba apsan kattarangkon chang 41-na kingking kal·taitaina nangaha ineba ua agana.

Confucius indake agana, “Our greatest glory is not in never falling, but in rising every time we fail.”

Ethiopia songo, saksa me·chik bilsi 12 ong·gipa Maseret Getachow minggipa re·na aro niknaba man·jahachim. Indiba ua songni NGO-rang, uni gimae dongenganiko nike mikgrirangni schoolona rimbaaha. Braille-ko skie ra·na skang, ua bang·a samrangko jakkalna nangaha. Ua, maironga neng·nikarangko chagrongoba, ua bil ama kakket tariaha aro ja·mano namen uni tikkelani kri mande ra·ako man·na kragipa aro niksenggipa saksa ong·baaha.

USA-ni Princeton songo donggipa mikgri Erik Weihenmayer dongachim. Uni ma·gipa uko grapchae dongjachina pangnan skirongaha. Ua kana ong·oba skanggipa changna buduko ra·bite-ja·rike Mount Everest-ko maldochengaha aro bang·a gipin a·gilsakni a·brirangkon ga·dapna man·aha. Erik ka·sine ka·sine bangbango bilgipa ong·baaha, a·brirangko maldogipa ong·baaha, marathon race-oba bak ra·gipa ong·baaha aro indaken gipin gipin daka-rikanirangoba mingsinggipa ong·baaha. Erikni gisiktango pangnan mingsako donaniara ‘jotton ka·anian’ ong·achim.

Erik Weihenmayer said: “Remember, dreams are good, but realities are better.”

4. On·kanganian Chakchikani Bite
“Anga nang·na pul bibalrangko indin on·gen. Ma’am, na·a angna Robibal attamanti nang·ni computer game-ko kal·na on·genma?” ine pul palgipa bi·sa saksa sing·aha. Raina, ua slum bi·sani computer kal·na gisiko nanganiko nike, uni kamoni re·baani ja·mano attamantian klas ra·aha. Da·ode ua slum bi·sara, Chennai songjinmao donggipa dal·gipa computer company-o software engineer ong·e kam ka·engaha. “Ia indake ong·gen ine anga mamingsaloba chanchisoan dongjachim,” ine Raina gisiktango ka·dimea gnang aganaha.

An·ching kam ka·on ba maikoba dakani ong·on on·kangani dongtelna nanga. Chu·sokanggipa dilgiparangoni sawa on·kangani dongja ine chanchia? Pilak chu·sokanirangan uamangni sepangona re·bae on·aha iade kattaan ong·nan amjawa. Indiba ua chu·sokaniko man·nasa uamang on·kanganiko dake chakchikaha. Ia bewalko ra·bitesa aro gisiktangtango donesa uamang chu·sokangtokaha.

Mingsinggipa Ali Baba Company-ko a·bachengatgipa Jack Ma, badita chang jegalako, watgalako aro gualanirangko dakaha; uarang pilakan una man·dapani ong·aha—maina Jack Ma on·kanganiko watgaljaha. Ua indake agana, “Anga chang 30-na kingking kam ka·na ine apply ka·e niachim, indiba jegalako man·aiaha.” Anga police-naba apply ka·e niaha, ra·chakjaha.” Anga, KFC-o kam ka·na ineba apply ka·e niaha, sak 23 manderang interview ra·anio chu·sokaha, indiba angade jegalako man·taiaha.” Jack Ma indake agana, “Na·a on·kangani baksa rake kam ka·ode, uno chu·sokna amani dongchong·mota. Indiba rake kam ka·na an·tangko ranta ka·jaode maming kamon chu·sokgipa ong·jawa.”

Chakchikani biteko nikna sengengon, uno chu·sokjaode na·a sakgipinko mamingsaloba matnangnabe; batesa, anga an·tangkon maioba namatna nangani dongama inesa chanchiskabo. Ma·a-paa, sakgipin ripengrang, skigiparang, noksul-songsulrang ba gipinrangni kosako complain ka·e namrorogipa ong·gen ine chanchianide gualbeani ong·aigen; indiba kamtangko nipile gital dakna re·mikkanggipasa dingtanganiko ra·bana man·gen. Paul indake agana, “Anga nama dakgrikaniko dakgrikaha, daarina nangako matchotaha, bebera·ako rakkiaha “(2 Timothy 4:7).

An·tangna Simsakaniko Dakania Namgniko Ra·baa

  • Gipinrangko niate na·a an·tangko gamchatnikgija ra·nabe. Namgipa ong·nasa taribo.
  • Nang·ni ka·tongni chanchiani baksa pilakkon namaia ine ra·nabe, nama aro dakchakgnigipa cholrangkosan basebo. Uarangko ra·bitskajaode nang’ janggi tanganian indin ong·gramaigen.
  • Salantio janggi tanganina simsake cholrangko sandibo.
  • Namako dakna chanchiengon, uko watgalnabe. Dontongahaode, minggipinko dakna na·a jajaatako man·gen.
  • Namako dakna jotton ka·anio, ‘angade perfect ong·ja’ ine pangnan an·tangko chanchina gualnabe. Ong·jaode na·a jotton ka·na sikjawa.
  • Obostarangko chagrongna kenaniko galbo, indiba uarangko ra·bitesa chegipa ong·na jotton ka·bo.
  • Nambatsranggipa kamko ka·e rakkiani cholde, jaktangko bilake donanian ong·a. Uni gimin dontongnabe.
  • Janggi tanganio ta·rakdugae chanchianiko dake an·tangko neng·gokatnabe, ong·jaode nang·ni neng·gokanichi miksongako gualaona sokgen.
  • Mamingsaloba skie ra·na ja·manchaknabe.
  • Somaiko indin gimaatnabe aro kattarangko simsakgija jakkalnabe; ong·jaode na·an rusiako man·skagen.
  • Janggi tanganiara songreanisa ong·a. Uni gimin ja·kuantion simsake ramatangko re·bo.

Proverbs says, “If you don’t like your results, change your approach.”

Book References:

  • J. Maurus, Shape Your Life to Be A Winner. Published by Better Yourself Books, Bandra, Mumbai, 2011.
  • Sue Augustine, “101 Ways to Make It Happen” in Turn Your Dreams into Realities. Published by Authentic Books, Secunderabad, 2007.
  • Eastman Curtis, “Uncover the Destiny Hidden in Your Heart” in Pursuing Your Life Dream. Published by Ben Books, Secunderabad, 2002.
  • Clare Ukken FSP, Lead Your Way to Success. Published by Pauline Sisters Bombay Society, Bandra West, Mumbai, 2010.
  • F.M. Britto, Keys to Success and Happiness. Published by Better Yourself Books, Bandra, Mumbai, 2009.
  • Shammi Sukh, “100 Thoughts to Motivate and Inspire” in Success is Yours. Published by Better Yourself Books, Bandra, Mumbai, 2013.
  • Luis S. R. Vas, “Effective Ways to Enhance Your Health, Well-being and Spiritual Growth” in Discover the Power of Your Inner Self. Published by Better Yourself Books, Bandra, Mumbai, 2012.